VIGAN CITY – Pito a nagsusugal iti nakemmeg ti naiwayat nga anti-illegal gambling idiay Barangay Lantag, Sta. Cruz, Ilocos Sur.
Iti pannaki-uman ti Bombo Radyo Vigan ken ni PCapt. Roger Baling-oay a hepe ti Sta. Cruz Municipal Police Station, adda ti nangipakaammo kadakuada nga adda iti agsusugal ti natayan iti nasao a lugar isu nga insigidada a nagresponde.
Naaktoan nga aggaay-ayam iti tong-its dagiti suspek a da Benito Navarette Rafanan, agtawen ti innem a pulo ket dua, naasawaan, Gerardo Jacobe Omanito, agtawen ti pitopulo ket uppat, naasawaan, Precila Mangaoang, agtawen ti innem a pulo ket dua, Johny Somera Javier, agtawen ti limapulo ket lima, naasawaan, Salud Omanito Magbanua, agtawen ti pitopulo ket pito, naasawaan, Milagros Lozano Jandoc, agtawen ti innem a pulo ket maysa, naasawaan nga agpapada nga agnaed idiay Brgy. Lantag ken ni Mario Suyat Molina, agtawen ti limapulo ket tallo, naasawaan nga agpapada nga agnaed idiay Brgy. Poblacion Este iti nasao nga ili.
Segun ken ni Baling-oay, naala ti dua a set ti baraha, dua a lamisaan a kayo, pito a monoblock a tugaw ken ti pusta nga aggatad ti duagasut ket innem a pulo a pisos kadagiti suspek a sumango ti kaso a panaglabsing ti Presidential Decree 1602.
Kabayatanna, nagpalagip manen ti hepe kadagiti umili a rumbeng a liklikan ti panagsugal ta maibilang a krimen ken ita a covid-19 pandemic ket posible a rason pay ti panagwaras ti virus ta malabsing iti health and safety protocol.
