VIGAN CITY – Nakemmeg dagiti pito a nagsusugal iti “DADO” idiay Barangay Manangat, Caoayan.
Nabigbig dagiti suspek a da Dante Rabilas Anyog, agtawen iti uppat a pulo, tricycle driver; Christopher Apenir Rapacon, agtawen iti uppat a pulo ket innem, construction worker; Mc Larry Paz Mendoza, agtawen iti duapulo ket tallo, mannalon; Harold Arce Rapanut, agtawen iti tallopulo ket uppat, tricycle driver; Mark Anthony Rabena Quinitip, agtawen iti tallopulo ket walo, construction worker, agpapada nga agnaed iti Barangay Manangat, Caoayan.
Ni met Rogelio Pangilnan Aguayo, agtawen iti uppat a pulo ket lima, tricycle driver ket agnaed iti Barangay Callaguip, Caoayan idinto nga agnaed iti Barangay Fuerte ni Jonard Vallejos Soberano, agtawen iti duapulo ket tallo, construction worker.
Naala kadakuada ti dua a set ti dice, dua a piraso ti clay pot cover, maysa a piraso ti bamboo cylindrical tube, maysa a piraso ti plastic folded long table, uppat a piraso ti monobloc chairs, sangapulo ket siam a piraso ti plastic chips ken pusta a PHP4,650.
Malaksid dayta, adda pay dagiti dadduma a karaman kadagiti nagsusugal ngem nakatarayda idi makasangpet dagiti pannakabagi ti linteg a nangiwayat iti operasyon.
Nakakustodian iti Caoayan Police Station dagiti natiliwan tapno dumalanda iti husto a proseso.
