VIGAN CITY – Panaglabsing iti Presidential Decree 1602 wenno Anti Illegal Gambling Act ti sangwen dagiti innem a natiliwan a nagsusugal ken ti maysa a naglibas idiay Barangay Daclapan, Cabugao.
Nabigbig dagiti suspek a da Mila Sabugo, agtawen iti limapulo ket lima; Marjorie Llanes agtawen iti uppat a pulo ket dua; Gemma Saniatan, agtawen iti limapulo; Vian Escobar, agtawen iti tallopulo ket maysa; Marites Paiste, agtawen iti uppat a pulo ket dua; Shiela Pascua, agtawen iti duapulo ket siam; ken ti maysa a naglibas a ni Marcos Tisbe, agpapada nga agnaed iti nasao a lugar.
Nangiwayat dagiti kameng ti Cabugao Municipal Police Station iti anti-illegal gambling operation a nakatiliwan dagiti innem a suspek a naaktuan nga agaayam iti Patikol.
Naala kadakuada ti maysa a set ti baraha ken pusta a walo gasut tallopulo ket lima a pisos.
