VIGAN CITY – Pito a mangngalap iti nakemmeg gapu iti ilegal a panagkalapda wenno panaglabsingda iti Municipal Ordinance No. 04-2005 idiay Brgy. Ambucao, Santiago.
Maibasar ti pakaammo manipod Santiago Municipal Police Station, naaktuan nga ilegal a nagkalap ket da Isidro Lapena Corpuz, agtawen ti pitopulo, Eduardo Sabado Callejo agtawen ti innem a pulo, Flor Cadacio Sabado agtawen ti limapulo ket pito, Alden Sabado agtawen ti uppat a pulo ket pito,Dante Umipig Esmeralda agtawen ti limapulo ket pito, Primo Bravo Jacob Sr, agtawen ti limapulo ket dua ken ni Jovino Edrada Sabado, agtawen ti limapulo ket pito nga agpapada a naasawaan, mangngalap nga agnaed iti nasao a lugar.
Nagturong iti nasao a lugar dagiti pannakabagi ti linteg gapu iti report a naawatda ket naaktuanda nga agkalkalap dagiti nasao a lallaki babaen iti ilegal a fish net.
Immunan a naipan iti Candon General Hospital, Candon City dagiti nakemmeg ta dimmalan iti medical examination ngem naipan met laeng iti Santiago Municipal Police Station tapno dumalan ti husto a proseso.
