VIGAN CITY – Kinemmeg iti nagtipon a pwersa ti Narvacan Police Station ken Criminal Investigation and Detection Group – Ilocos Sur idi alas dos iti malem idi October 4 ti suspek a ni Eric Tadena Jr Cabaro, agtawen ti sangapulo ket walo nga agnaed idiay Brgy Sta Lucia, Narvacan gapu iti panaglabsingna ti Republic Act 7610 wennu Special Protection of Children Against Abuse, Exploitation and Discrimination Act.
Ti pannakakemmeg ni Tadena ket babaen iti bileg ti warrant of arrest nga inparuwar ni Hon. Elizabeth Bringas ti Regional Trial Court, Branch 72, Narvacan idi September 26 iti agdama a tawen.
Idiay met laeng ili ti Narvacan, nangruna idiay Barangay Parparia, ket nakemmeg ni Richard Dulay nga agtawen ti dua pulo ket tallo, baro nga agnaed iti nasao a lugar babaen iti nagtipon a puwersa ti Narvacan PNP ken CIDG- Ilocos Sur idi ala una kwarenta y singko iti male midi October 4 gapu iti kaso na a qualified rape kas maibasar ti warrant of arrest nga inparuwar ni Hon. Elizabeth Bringas ti RTC, Branch 72, Narvacan idi September 30 iti agdama a tawen.
Kabayatanna, kaso a panaglabsing ti Provincial Ordinance 1, Article IV, Section 1 and 2, series of 2009 iti nakakemmegan da Daniel Remolacio Sr nga agtawen ti lima pulo ket walo, naasawaan; Daniel Remolacio Jr., nga agtawen ti tallo pulo ket uppat, naasawaan nga agpada a mangngalap kenni Eibol Remolacio nga agtawen ti dua pulo ket lima nga agpapada nga agnaed idiay Barangay Solot-Solot, San Juan.
Ti pannakakemmeg dagiti tallo ket babaen iti warrant of arrest nga inparuwar ni Hon. Judge Khrysty Ahnn Cac- Rivera ti 1st Municipal Circuit Trial Court, Magsingal – San Juan nga inbanag ti San Juan municipal police station idi alas otso iti agsapa idi kalman, October 4.
