VIGAN CITY – Pito iti nakemmeg gapu iti panagay-ayamda iti pusoy idiay Brgy. Bayubay Sur, San Vicente.
Segun ti San Vicente Municipal Police Station, dagiti naglabsing iti Presidential Decree 1602 ket ni Johnny Rubianes Reotutar, agtawen iti limapulo ket uppat, carpenter nga agnaed idiay Pantay Laud, Vigan City; Rodel Castillo Aspacio, agtawen iti uppat a pulo ket tallo, naasawaan, foreman nga agnaed idiay Manangat, Caoayan; Joseph Daquel Rabanal, agtawen iti uppat a pulo ket uppat, naasawaan nga agnaed idiay Paratong, Sta. Catalina; Edwin Tabaco Alcantara, agtawen iti limapulo ket innem, naasawaan, carpenter nga agnaed idiay Pudoc, San Vicente; George Achiles Arubio, agtawen iti uppat a pulo ket uppat, carpenter nga agnaed idiay Capangpangan, Vigan City; John Yadao Rin, agtawen iti limapulo ket dua nga agnaed idiay Brgy. San Sebastian, San Vicente; ken Wexter Urayanza Unciano, agtawen iti duapulo ket dua nga agnaed idiay Barbarit, Magsingal.
Insayangkat dagiti pannakabagi ti linteg iti Anti-Illegal Gambling Operations iti nasao a barangay a nagresultaan iti pannakakemmeg dagiti suspek ta naaktoanda a nagay-ayam ti pusoy.
Naala kadakuada iti limagasut innem a pulo a pisos a pusta, maysa a set iti baraha, pito a monoblock a tugaw, maysa a kayo a lamisaan ken maysa a kayo a tugaw.
Naipan iti Ilocos Sur Provincial Hospital Gabriela Silang dagiti suspek para iti medical examination ngem naiyakar met laeng iti Police Station para iti proper documentation ken disposition.
