Inwaragawag ti transport group a Piston ti panangisayangkatda iti transport strike inton Huebes, Marso 19 kas protesta iti panagpangina ti presio ti produkto-petrolyo gapu iti riribuk iti Middle East.
Segun ken ni Piston National President Mody Floranda, naituding ti panangipila ti Piston iti P5 a nayon a plete tapno matulongan dagiti drayber a maabrut ti napukaw a pastrekda.
Binabalaw pay ti grupo ti P5,000 cash aid nga inted ti gobierno kadagiti apektado a drayber ken operator, a patienda a saan a makanay ken katukad laeng iti mano nga aldaw a gastosda iti langis.
Nagpanawagan ti Piston iti gobierno nga ikkatenen ti Oil Deregulation Law ken ti excise tax kadagiti produkto-petrolyo.
Inallukoy ni Floranda dagiti oil company nga ipangruna pay laeng nga ilako dagiti nalaklaka nga stock ti petrolyo sakbay a mangipatungpal iti price increase.
