VIGAN CITY – Nu umabot ton ti lima ribo ti bilang dagiti positive cases ti coronavirus disease 2019 idiay South Korea, posible a mapursaran ton nga agawid ditoy pagilian dagiti Pilipino nga agtrabtrabaho iti nasao a pagilian.
Dayta iti pinasingkedan ni Bombo International Correspondent Jhonel Tabion Realin a taga- Tamurong, Sta. Catalina ngem agtrabtrabaho ti maysa a textile company idiay Daegu, South Korea iti pannaki-uman kenkuana ti Bombo Radyo Vigan.
Ti agdama, iyuray laengen ni Realin a malpas iti kontrata na ket saan na pay nga ammo nu makasublin to pay idiay South Korea wennu saanen.
Innayon na nga in-inuten a marikrikna da iti epekto ti COVID- 19 kadagiti pagtrabtrabahoan da a factory ta kimmapsot iti produksyon da ken awanen dagiti empleyado a napusgan nga agtrabaho iti rabii ta awan unay ti aramiden da nga order wennu produkto.
