Impakita manen ti laing ni Pinay tennis sensation Alex Eala kalpasan nga inabakna ti world no. 10 a ni Elina Svitolina iti quarterfinals iti DC Open.
Iti napasamak a laban idiay Washington DC, nangabak ni Eala babaen ti straight sets, 6-3, 6-4 tapno makastrek ti semifinals iti prestihiyoso a torneo.
Iti umuna a set, naaddaan ti puntos dagiti dua a player sakbay a naala ni Eala ti 4-2 nga abante ken naisarra ti set.
Iti maikadua a set, napaspas a limmamang ni Svitolina iti 2-0 ngem nakabawi ni Eala ken narekordna iti tallo a nagsasaruno a pangabak a gappuanan ti pannakaalana iti 4-3 a lamang.
No man pay nakakamakam ti Ukrainian iti 4-all, nagtalinaed a kalmado ti Filipina ken lineppasna ti laban iti maudi a dua a game.
Ti pangabak ket pammaneknek iti laing ni Eala kalpasan nga immunan nga inabakna ni Svitolina iti Berlin Open idi Hunyo.
