VIGAN CITY – Maragsakan ti mangidaulo ti Sabuanan Elementary School iti pannakairugi ti pilot face to face dagiti agadadal ti nasao a pagadalan.
Iti pannaki-uman ti Bombo Radyo Vigan kenni Jasmine Dasargo, mangidaulo ti Sabuanan Elementary School, dakkel a panagyaman da ti suporta ti Local Government Unit tapno maisubli iti face to face learning dagiti estudyante a maysa kadagiti naapektaran iti COVID19 pandemic ken napalaus iti ragsak a marikriknada a makita manen dagiti agadadal.
Nabingay ti dua a grupo wenno batch dagiti estudayante nga adda ti pakabuklanna a sangagasut sangapulo ket dua nga agadadal ti kinder agingga Grade 3.
Sumrek ti 1st batch wenno umuna grupo iti aldaw ti Lunes, Mierkules ken Biernes iti bigat idinto a ti sabali a batch ket Martes, Huebes ken Biernes iti malem.
Kabayatanna, pinasingkedan ni Sta. Lucia Mayor Joseph Simon Valdez a naidumduma iti nariknada iti pannakakitada nga adda dagiti ubbing ti pagadalan a maisuro ken babaen ti letter of support ken iti awan sardeng a tulong kadagiti eskwela ket naaprubaran iti pannakaisayangkat ti pilot face to face learning ti Sabuanan Elementary School.
