Kayat a malawagan ti maysa a Pilipino nga adda idiay Spain nu apay a dua a balota iti simmangpet kadakuada kagiddan iti pannakaisayangkat iti Overseas Absentee Voting iti agduduma a pagilian.
Iti pannakipapatang ti Bombo Radyo Vigan ken ni Bombo International News Correspondent Arielle Isabel Pera, tubo iti ili ti Tagudin nga adda ita idiay Andora, Spain, dakkel a saludsod kenkuana iti dua a balotada ta saanna nga ammo nu pakaipanannanto kalpasan iti panagfill-out da.
Segun ken ni Pera, apaman a naipakaammo kadakuada a nag-cast iti botos iti Spain Embassy idiay Andora ket napanda tapno kitaen nu addada iti listaan ngem adu dagiti awan iti naganna ta adda iti sabali a lugar, nupay kasta idi April 17 ket nakitana iti naganna iti listaan kaduana ti inana ken naasideg a gayyemna isu a nagbotosda ken nagkakaduada pay iti maymaysa a lamisaan ken isuna iti mismo a nangiregreg iti balotana.
Nupay kasta, dakkel a panagduduana ta kalpasan iti dua nga aldaw ket bayat iti kaaddana iti pagtaenganda iti nasao a pagilian ket adda iti simmangpet a maysa pay a balotana isu a pinagkumparana iti immuna ngem isu nga isu a gappuanan iti panagpost na iti social media ket naamwanna nga adu da a nakaawat iti dua a balota.
