VIGAN CITY – Nairekord ti Department of Health ti umuna a kaso ti pannakatay gapu ti e-cigarette wenno vape-associated lung injury.
Segun ken ni DOH Assistant Secretary Albert Domingo, ti biktima ket maysa nga agtawen iti duapulo ket dua a natay gapu iti pannakaatakena ta agsagsaba iti nakaro a lung injury nga epekto ti inaldaw a panagaramatna iti vape iti naglabas a dua a tawen.
Pinasingkedan met ni health advocate Dr. Rizalina Gonzales nga ita a bulan, tallo ti nairekord ti pagilian a kaso ti EVALI.
Maipalagip nga uray kontraen idi ti DOH ken dagiti health expert, naipasa ti “Vape Bill” wenno ti Vaporized Nicotine and Non-Nicotine Products Regulation Act, ta naglapse into law idi 2022.
Iti salinong ti linteg, ti age restriction para kadagiti nasao a produkto ket naibasbassit manipud iti duapulo ket maysa ket sangapulo ket walon iti agdama.
