Inaprubaran ti Pilipinas ti bilateral regionalization scheme kadua ti Chile a mangpapardas iti panagserrek dagiti live birds, piek, itlog, ken semilya manipud kadagiti lugar iti nasao a pagilian nga awan ti kasona iti highly pathogenic avian influenza (HPAI) wenno bird flu.
Sagudayen ti patakaran ti Department of Agriculture, a saan nga otomatiko a maiparit ti amin a poultry import manipud iti intero a pagilian no adda outbreak ti bird flu, no di ket mapalubosan laeng ti panagangkat manipud kadagiti lugar a natalged ken awan ti sakitna.
Segun iti Bureau of Animal Industry, napaneknekan nga adda naan-anay a kontrol ken veterinary measures ti Chile kontra iti bird flu.
Gagem ti katulagan a masigurado ti suplay ti poultry products idinto a masalwadan latta dagiti lokal nga agtartaraken ti manok kontra iti panagraira ti sakit.
