Karaman ti Pilipinas iti pito a “priority countries” para iti baro nga international food assistance programs ti Amerika, segun iti US Department of Agriculture (USDA).
Kadua ti Pilipinas iti listaan ti Bangladesh, Bolivia, Ecuador, Morocco, Sri Lanka, ken Thailand iti salinong ti Food for Progress program ti USDA.
Awan pay ti nairruar a detalye mainaig iti pondo ngem manamnama a mangilatang ti USDA ti agingga USD 226 milyon para iti baro a katulagan iti fiscal year 2026.
Ti tunggal proyekto ket posible nga umabot iti USD 28 milyon agingga USD 35 milyon ket agpaot ti lima a tawen.
Ti programa ket ipatungpal ti USDA Foreign Agricultural Service (FAS) iti pannakibinnulig kadagiti kwalipikado nga organisasion tapno agisayangkat ti proyekto iti agrikultura, ekonomiya, ken imprastruktura bayat a mapapigsa pay ti trading ti US.
