Pinasangbayan ti Archdiocese of Nueva Segovia ti Pilgrim Image ti Our Lady of Guadalupe iti Vigan City, Ilocos Sur, idi kalman kagiddan ti pannakaisayangkat dagiti religious activities kas paset iti panangbisita iti nasantoan nga imahen iti probinsia.
Naisangpet ti imahen iti Ilocos Sur arc alas dies iti agsapa sakbay a naipan iti Vigan City Cathedral iti alas onse y media.
Indaulwan ni Rev. Cosmenio Rosimo Jr. ti Rite of Acceptance iti alas kuatro ti malem, a sinaruno ti panangikabil iti telana ken panangkararag iti Guadalupean Rosary.
Indaulwan met ni Rev. Fr. Jerry Avisa ti welcome mass iti alas singko kinse iti malem.
Napasarunwan daytoy iti prusision dagiti imahen iti alas sais y media iti rabii, idinto a nagtultuloy ti panagbantay ken panagkararag para iti Our Lady of Guadalupe manipud alas otso agingga alas nuebe iti rabii.
Paset ti pananglikmot ti imahen iti panagsagana para iti maika-500 nga anibersaryo ti panagparang ti Our Lady of Guadalupe ken ni San Juan Diego idiay Mexico inton 2031.
