VIGAN CITY – Nasalamaan iti maysa a pick-up ta illegal a nagiserrek ken nagibiahe iti duapulo a burias idiay Brgy. Maynganay Sur, Sta. Maria.
Segun ti Sta. Maria Municipal Police Station, dagiti naglabsing iti Provincial Ordinance No. 15-06 Series of 2015 ket da Leyra Ballacillo Basilio, agtawen ti tallopulo; ken Paul Oliver Camaddo Agcalinga, agtawen ti tallopulo ket lima nga agnaed idiay Barangay San Gregorio, La Paz, Abra.
Naipakaammo iti illegal a panagibiahe dagiti dua kadagiti burias manipod La Paz, Abra nga agturong idiay Sta. Maria isu a nagresponde dagiti otoridad ket apaman a naideliver dagiti burias iti Centrum Gasoline Station ket saan a nakapresentar dagiti suspek ti naan-anay a dokumento a gappuanan ti pannakakemmegda.
Naipan dagiti suspek iti Sta. Maria Police Station pakairamanan ti lugan a Mitsubishi Strada nga adda buriasna.
Nakikammayet dagiti otoridad iti Municipal Agricultural Office ken Provincial Veterinary Office para iti disposition iti naala a burias.
