VIGAN CITY – Umabot iti walo gasut a ribo a pisos ti sanikua a dimmapo iti pannakauram ti pagtaengan idiay Brgy. Ayusan Norte, Vigan City.
Iti pannaki-uman ti Bombo Radyo Vigan kenni Arnel Verzosa, patienda a ti naglutuan a dalikan ti immuna a nagtaudan ti apoy agingga a naabotna ti extension wire isu a kimmaro ken napaspas a nagkayamkam.
Ala una iti parbangon, adda ti makariing kadakuada ta adda ti asok ket impagarupda a nadepdepen ti dalikan.
Nakigtotda laengen ta napigsa ti taol dagiti aso ket nakitada a maururamen ti maikadua a kadsaaran a paset ti pagtaenganda.
Naaramid iti light materials ti nasao a paset ti pagtaengan iso a napaspas a nagkayamkam ti uram no man pay insigida a nakaresponde dagiti bumbero.
Agyamyaman ni Verzosa ta awan ti nadangran kadakuada ken kadagiti kameng ti Vigan City Fire Station ta no saanda a nakasangpet nga isigida ket posible nga adda dagiti pagtaengan ti karrubada a nairaman.
Kabayatanna, nagpalagip ni Fire Senior Inspector Rex Dela Cruz iti tunggal maysa a no panawan dagiti pagtaengan ket siguradwen a maikkat dagiti nakasaksak nga appliances wenno ibaba ti braker ken isarra dagiti liquefied petroleum gas.
