VIGAN CITY – Limapulo ket tallo a ribo a pisos a gatad ti nadumaduma a klase ti cellphone ti mapapati a tinakaw dagiti saan pay a nabigbig a suspek iti pagtaengan ni Nora Ponsalan, agtawen iti innem a pulo ket siam a taga-Barangay Bateria, San Esteban.
Iti pannaki-uman ti Bombo Radyo Vigan ken ni Police Executive Master Sergeant Miguel Aman Arreola Jr., alas tres iti parbangon ket nakariing ti biktima ken ti asawana a ni Danilo Cardenas Punsalan, agtawen iti pitopulo ket tallo ta napan immisbo ti biktima.
Idi nagsubli ket nadlawna nga awan dagiti cellphone iti nangidiswanna sakbayda a naturog isu a sinapulna ket idi nakitana a ti arwanganda iti likod a nakalukat, atapennan a natakawanda.
Insigida met a nagpatulong ti biktima iti driver-da a matmaturog iti bangir a kuarto ket natakuatanda nga uray ti cellphone ti drayberda ket mapukpukaw.
Dagiti mapukpukaw ket pakairamanan ti Huawei cellphone nga aggatad iti PHP16K; maysa a Samsung SG nga aggatad iti PHP9K; maysa a Samsung A12 cellphone nga aggatad iti PHP16K; maysa nga android cellphone nga aggatad iti PHP5K; ken maysa nga Oppo cellphone nga aggatad iti PHP7K.
Maipagarup a dagiti suspek ket simrekda iti daya a paset ti nakalukat a sliding window ti pagtaengan ken rimuarda iti arwangan iti likudan.
Innayon ni Areola a nalipatan ti biktima nga inrikep ti kuartoda ken kanayonda a luklukatan ti tawada gapu ta kayatda ti makalang-ab iti presko nga angin.
Awan ti nadnadlawan ti agassawa nga umar-arubayan kadakuada malaksid laeng ti maysa nga agbotbote-landok a napan naggatang kadakuada.
Manarimaan met ti panangkita dagiti pannakabagi ti linteg kadagiti CCTV iti kabangibang a barangay ti nasao a lugar para iti pannakatunton dagiti suspek.