VIGAN CITY – Tallopulo ket uppat a ribo a pisos a gatad ti nadumaduma a klase ti imported pork products ken uppat a crates iti tray ti itlog a naikarga iti Aluminum Wing Van Truck ti nasalamaan iti animal quarantine checkpoint idiay Brgy. Gabur Sur, Sta. Cruz iti baet ti panangsalwad ti probinsia iti African Swine Fever.
Dagiti kontrabando ket impastrek ditoy probinsia ni Lorenzo Zacarias, agtawen iti limapulo ket uppat a taga-Wawa, Lingayen, Pangasinan, nagmaneho iti nasao a trak.
Iti pannaki-uman ti Bombo Radyo Vigan ken ni Provincial Quarantine Officer Martel Quitoriano, dry goods ti naideklara a linaon ti trak ngem gapu ta nakita dagiti nakabantay iti checkpoint nga adda dagiti nabasa a karton ket naduktalanda a ti kargana ket nadumaduma nga imported pork product ken presko a karne a naggapu idiay Ireland ngem ti storage-na ket naggapu iti Pangasinan.
Awan ti papeles dagiti produkto ken saan nga accredited ti luganna nga agipastrek kadagiti nasao a produkto.
Naipanen iti provincial quarantine office dagiti kontrabando idinto a ti suspek ket dumalan iti husto a proseso.
