VIGAN CITY – Tallopulo a karton ti frozen meat products a mapatta-patta nga aggatad iti sangagasut duapulo a ribo a pisos ti nasalamaan idiay Barangay Magsaysay, Santa.
Dagiti kontrabando ket nailugan iti L300 van a minaneho ni Gilbert Yaris, agtawen iti duapulo ket siam a taga-Barangay Kayarisan Dulao, Aringay, La Union kaduana ni Nap Padilla, agtawen iti duapulo ket walo ken ni Lester Dela Peña, agtawen iti duapulo ket dua nga agpada a taga-Pangasinan.
Nangipatungpal dagiti kameng ti Santa Police iti traffic rules and regulations iti national highway iti nasao a barangay idin ta pinarada ti van ket idi panangberberipikada, natakuatan dagiti kontrabando nga awan ti naan-anay a dokumentona.
Ti drayber ken ti pasaherona kasta payen dagiti nasalamaan a kontrabando ket naipan iti Provincial Veterinary Office tapno maidalan iti husto a proseso.
