VIGAN CITY – PHP115,000 a gatad ti diesel engine a kukua dagiti uppat a mannalon ti natakaw idiay Barangay Mapisi, Nagbukel.
Nabigbig dagiti suspek a da Kenjie Delos Santos Cabang, agtawen iti sangapulo ket siam ken ni Jessie Caban Billena, agtawen iti duapulo ket uppat, agpada a taga-Barangay Balaweg, Nagbukel.
Dagiti biktima ket isu da Rudolfo Cabrera Garcia, agtawen iti limapulo ket uppat, Danilo Padrion Viloria, agtawen iti uppat a pulo ket dua, Eugene Tuyo Manzano, agtawen iti uppat a pulo ket walo, agpapada a mannalon ken taga-Barangay Mapisi, Nagbukel ken ni Victoriano Quiloman Cadenas, agtawen iti tallopulo ket innem, taga-Barangay Poblacion East, Nagbukel.
Personal a nagturong dagiti biktima iti Nagbukel Police Station iti alas singko iti bigat ti February 26 tapno ireport a mapukpukaw dagiti diesel engine motors da nga adda pay naikabit a water pump a pagpadpadanumda iti talon.
Dagiti natakaw ket ti Kubota RK70 nga aggatad iti PHP70K, kukua ni Garcia; Yama Diesel Engine nga aggatad iti PHP15K a kukua ni Viloria; Kubomar Diesel Engine nga aggatad iti PHP15 a kukua ni Manzano; ken ti Kubomar Diesel Engine nga aggatad iti PHP15K a kukua met ni Cadenas.
Sakbay ti insidente, nakita nga agliklikmot dagiti suspek a da Cabang ken Billena iti alas tres iti malem ti February 25 idiay Barangay Estancia.
Iti pannaki-uman ti Bombo Radyo Vigan ken ni Police Captain Floro Cosning Jr., namindua a nagsubli iti lugar dagiti suspek a nangilugan iti kurong-kurongda dagiti tinakawda a makina a pinagtinnulonganda nga inawit.
Aminado met dagiti dua a suspek a tinakawda dagiti uppat a makita isu a narekobre met dagitoy idiay Barangay Sucoc, Narvacan a ti maysa ket naala manipud ken ni Harold Luna nga insukatna iti motorsiklo ngem awan ti napasamak a transaksyon iti nagbaetan da kadagiti suspek.
