VIGAN CITY – Sangagasut a ribo a pisos a gatad ti processed meat ti nasalamaan iti animal quarantine checkpoint idiay Brgy. Saoat, Sta. Cruz.
Dagiti nagipastrek ket da Joel Gaoiran Gaspar, agtawen iti limapulo ket dua a taga-Cabungaan, Laoag City, Ilocos Norte-driver ti wing van truck ken dagiti pahinantena a da Vanny Corpuz Arellano, agtawen iti tallopulo ket lima ken ni Zander Cachola, agtawen iti duapulo ket innem nga agpada a taga-Batac.
Awan ti shipping permit ti kinargada a karne, awan ti inspection certificate-na, saan nga accredited ti luganda ken saanda a nagpaidalan iti inspeksyon kasta payen a linabsingda ti temporaryo a pannakaiparit ti karne ti baboy ditoy probinsia.
Naipan dagiti nagipastrek iti kontrabando iti Sta. Cruz Police Station ken kadagiti staff ti provincial quarantine para ti pannakamweltada.
