VIGAN CITY – 1.3 milion a pisos a gatad iti 223 a tseke ti manamnama a maiwaras kadagiti mannalon a napeste wenno nadidigra iti mulada idi napan a tawen.
Iti pannaki-uman ti Bombo Radyo Vigan ken ni Philippine Crop Insurance Corporation Officer-in-charge Mercury Pascua, dagiti 223 a partial checks ket maiwaras kadagiti nadumaduma a munisipio iti District 1 and 2 ditoy probinsia.
Inlawlawagna nga awan ti pagdanagan dagiti mannalon a saan a maikkan ita ta inton sumaruno a bulan ket addanto pay laeng tseke nga agsangpet iti opisinada.
Nupay kasta, kanayonda a palagipan dagiti mannalon iti status ti insurance da ken impakaawatna a saan nga insigida a maaprubaran ti panagaplikarda iti insurance benefit kadakuada a mannalon isu nga awan dakesna no mapanda latta ifollow-up.
Malaksid ti dayta, sakup payen ti PCIC a benepisyaran dagiti agmulmula iti tabako ket tapno mabenepisyaranda, masapul a nakaaplikardan kalpasan iti sangapulo ket lima nga aldaw a panagimulada wenno sakbay nga adda didigra.
