VIGAN CITY – Mapatta-patta a lima pulo ribo a pisos iti intaray dagiti saan pay nabigbig a suspek a napan nagtatakaw idiay Quimmarayan Elementary School, Barangay Quimmarayan, Bantay.
Segun ken ni Police Master Sergeant Aniceto Gelacio ti Bantay municipal police station, dagiti naala nga alikamen iti uneg ti principal’s office ket maysa a laptop, cellphone, tablet ken desktop speaker.
Naireport kadagiti otoridad iti nasao a panagtakawan idi nadlaw ni Floraceali Laurente Paz nga agtawen ti uppat a pulo ket walo, naasawaan, reliever teacher iti nasao a pagadalan a napursaran a nalukatan iti opisina ti principal ken naduktalan nan a mapukpukawen dagiti nasao nga alikamen.
Blangko pay laeng dagiti otoridad nu siasino dagiti suspek ken nu adda pakainaigan na iti napasamak kadagiti napalpalabasen a panagtakawan kadagiti pagadalan idiay ili ti Bantay.
