VIGAN CITY – Sangapulo a milyon a pisos nga inisyal a tulong pinansyal ti inted ti National Historical Commission iti lokal a gobierno ti Candon City para iti pannakai-restore ti ancestral house ti revolutionary hero a ni Gabriela Silang idiay San Antonio, Candon City a naipatakder uppat a gasut a tawenen ti napalabas.
Segun kenni Candon City Information Officer Jun Balbin, iti panangidaulo ni Mayor Ericson Singson ken 2nd District Rep. Eric Singon, nangipasa ti lokal a gobierno ti dokumento idiay NHC tapno ipakaaammo ti tarigagay da nga ipreserbar ti nasao a pagtaengan a kukua ti pamilya Cariño.
Inlawlawag ni Balbin a posible pay a manayunan ti tulong pinansyal nga inted ti NHC kadagiti sumarsaruno a tawen ta atiddog ti proseso ti restoration ken saan da a kabaelan a makumpleto no ti pondo laeng ti city government ti mausar.
No makumpleto ti preservation ken restoration ket agserbin a tourist destination ti nasao nga ancestral house ta ado ti masursuro dagiti turista ta mailadawan ti biag dagiti nababaknang a pamilya ken dagiti nadumaduma a kultura ken tradisyon iti nagkauna a panawen.
