Nagkiddaw ti Philippine Coconut Authority iti nayon a P1.26 billion a pondo tapno maragpat ti target a 25.4 milion a bin-i ti niog a maimula ita a tawen kas sukat dagiti daanen a kayo ti niog.
Iti agdama, 16.85 milion a bin-i laeng ti kabaelan a maimula, isu a kasapulan pay ti 8.5 milion a bin-i.
Segun iti PCA, napateg ti nayon a pondo tapno mapagtalinaed iti husto nga schedule ti kalikagum a makaimula iti 100 milion a kayo ti niog inton madanon ti 2028.
Pinasingkedan da PCA Administrator Dexter Buted ken Agriculture Secretary Francisco Tiu Laurel Jr. a ti programa ket manamnama a mangpangato iti pastrek dagiti agnioniog, mangpataud iti ad-adu a trabaho, ken mangpapigsa iti industria ti niog ken seguridad iti taraon.
Uray no kurang ti pondo, itultuloy ti PCA ti programa babaen ti pannakibinnuligda kadagiti lokal a gobierno, komunidad ken dadduma pay a maseknan.
