VIGAN CITY – Suportaran ni dati a Health Secretary ken agdama nga Iloilo Rep Janette Garin ti privatization iti Philippine Health Insurance Corporation no maipapan iti koleksion iti pondo ken ti nalawag a panangipakita no ania ti nagbanagan ti pondo.
Iti pannaki-uman ti Bombo Radyo Vigan ken ni Garin, kasapulan a saan laeng a kadagiti ahensia ti gobierno ti proseso a dumalanan ti nasao a banag no di ket iti pay Inter Agency tapno maadal a naimbag.
Ingunamgunam ni Garin ti pannakaikkaten dagiti sindikato iti Philhealth ken napateg a dagiti kwalipikasyon ti agbalin nga opisial ket rumbeng a nalaingda kadagiti health financing ket pudno a saan a maliklikan a maabuso iti sistema ti nasao nga ahensia.
Patien ti kongresista nga inaramat dagiti opisial ti COVID19 pandemic tapno makairuar ti nadakdakkel pay a gatad nga awan met iti nasayaat a pakaibanaganna.
