Impasigurado ti Philhealth nga agar-aramiddan iti addang tapno masulbar dagiti parikut iti panangala iti reseta iti salinong ti GAMOT clinics ti YAKAP primary care package.
Segun iti ahensia, dagiti pannakaitantan ket gapu kadagiti administrative ken readiness requirements a kasapulan a malpas dagiti dadduma a klinika sakbay a makaited iti libre nga agas.
Makitintinnulong ti Philhealth kadagiti YAKAP clinic babaen iti panangited iti technical support, onsite validation ken inaldaw a monitoring tapno mapaalisto ti proseso.
Iti salinong ti GAMOT program, adda 75 a libre nga agas a mabalin a maala dagiti kwalipikado a miembro, agraman ti libre nga screening para kadagiti uppat a klase ti cancer.
Ti YAKAP program, a nairusat idi Hulyo 2025 ket isu ti napalawa a bersion ti Konsulta program ken mangididiaya iti primary care services kas ti check-up, agas, ken laboratory test.
Mabalin a makikammayet dagiti miembro iti Philhealth hotline no adda parikutda iti panang-access iti serbisio.
