Inlawlawag ni Armed Forces of the Philippines (AFP) Chief Romeo Brawner Jr. a nabayagen a mangmangted ti seguridad ti Philippine Navy para kadagiti mangngalap a Pilipino idiay West Philippine Sea.
Dayta ket uray sakbay pay nga imbilin ni Pres. Ferdinand Marcos Jr. iti Philippine Coast Guard ti panangpapigsa ti salaknib dagiti mangngalap nga agturturong iti WPS kasaruno ti water cannon attack dagiti Chinese vessels kontra kadagiti mangngalap a Pilipino idiay Escoda Shoal idi December 12 a nakadunoran iti uppat a Pilipino ken nakadadaelan ti bangka a pagkalap.
Nagsarita ti AFP chief kalpasan a nasaludsod maipanggep ti bilin ti presidente iti PCG nga agdeploy iti nayon a barko kadagiti strategic location iti WPS tapno siguradoen iti kinatalged dagiti mangngalap a Pilipino bayat iti panagkalapda a tradisyonal iti fishing grounds.
Kinuna met ni Gen. Brawner a saanda nga ibilang a gray zone activities dagiti tignay iti China idiay WPS no diketdi awaganda nga illegal, coercive, aggressive ken deceitful.
Agtaltalinaed ti whole-of-nation approach a panagtignayda kadagiti tignay ti China kaduada ti Philippine Coast Guard, Bureau of Fisheries and Aquatic Resources (BFAR) ken Philippine Navy.
