Inwaragawag ti Department of Foreign Affairs (DFA) a nakasagana dagiti embahada ken konsulado ti Pilipinas a tumulong no makapagdesision dagiti suspek iti flood control scandal a sumuko bayat nga adda iti ballasiw-taaw.
Segun iti DFA, naka-standby dagiti embahada idiay New Zealand ken Jordan, kasta met ti Consulate General idiay New York, para iti koordinasion no ibilin dagiti autoridad ti Pilipinas.
Daytoy a gannuat ti nasao nga ahensia ket kalpasan nga impadamag ti Department of the Interior and Local Government (DILG) a sumagmamano kadagiti nairaman iti nasao a kontrobersia ket adda pay laeng iti ballasiw-taaw, pakairamanan da dati nga Ako Bicol Party-List Representative Zaldy Co a naudi a natakuatan idiay Japan, ken sangoenna ti kaso a graft ken malversation of public funds.
Segun met iti report ti DILG ken Philippine National Police (PNP), adda idiay New Zealand ni Aderma Angelie Alcazar ti Sunwest Construction; adda met idiay New York ni Sunwest Treasurer Cesar Buenaventura; ken adda idiay Jordan ni Montrexis Tamayo ti Department of Public Works and Highways (DPWH), kas panangsangoda ti kaso maipanggep iti mapapati a substandard a PhP289-Million road dike project idiay Naujan, Oriental Mindoro.
Kinuna met ni Presidente Ferdinand R. Marcos, Jr. a pito manipud kadagiti 16 a personalidad ti addan arrest order-da ti nakakustodian ti gobierno, idinto nga inallukoyna dagiti nabatbati pay a suspek a sumuko. Augie Arellano
