Binallaagan ni Provincial Veterinary Officer Donna Mae Rosaria dagiti pet owner kontra iti agraraira a sakit ti aso a maawagan iti ‘parvovirus’.
Daytoy a sakit ket maala ti aso manipud iti aglawlawna ken awan ti bakuna a mabalin a maitudok kadakuada no nakaptandan.
Iti pannaki-uman ti Bombo Radyo Vigan ken ni Rosaria, no adda innem a lawas ti ason ket nasken a mabakunaandan ta no uppat ket gudwa a bulanda ket narisgodan iti daytoy a sakit.
Mabalin a makaptan ti aso iti nasao a sakit no adda direct contact ken kasapulanda met latta ti mai-isolate.
Dagiti pagilasinan nga adda parvovirus ti aso ket ti saanna a pannangan, agbakwar ken agibleng iti dara.
Kunana a no adda kastoy a madlawda iti asoda ket masapul a maipan nga insigida iti Provincial Veterinary Office agsipud ta mabalin a madehydrate no maitantan.
