VIGAN CITY – Kiddaw ti Ilocos Sur Maritime Police Station a nu maaddaan ti baro a recruit ti personnel iti Regional Office ket maikkanda pay iti nayon a pwersa.
Iti pannakipapatang ti Bombo Radyo Vigan ken ni PMaj. Rommel Lagasa nga Station Chief iti Ilocos Sur Maritime Police Station, agkurkurangda iti maritime personnel ta adda laeng iti pakabuklan a duapulo ket dua iti intero a probinsia, a ti sangapulo ket naideploy iti siudad ti Vigan idinto a sag-innem iti ili ti Cabugao ken Sta. Cruz.
Ngem nupay kasta ket activated dagiti coastal Barangay Information/Intelligence Network wenno BIN a makatulong kadakuada iti panagbantay ken panangmonitor iti masakupanda a kabaybayan.
Saan la a ti kina-kurang iti personnel ta awananda pay ti land asset idinto a dua laeng iti water wenno floating asset-da isu a ti araramatenda iti panagrespondeda kadagiti agpatulong ket dagiti mismo personal a luganda.
Gapu kadagiti pagkurangan nga assets ket siniguradona nga agrequestda iti regional office tapno nasaysayaat ti panagrespondeda nu adda iti agpatulong.
