VIGAN CITY- Nagpaskwa iti pagbaludan ni Franklyn Valencia a taga Barangay 26, Laoag City, Ilocos Norte, alias ‘Pastor Rey Cabrera’ a taga Orence, Narvacan, gapu iti panagpammarang na a pastor tapno makasolicit ti kuarta iti pagtaengan da dati nga Ilocos Sur Governor ken agdama a Narvacan Councilor Luis Chavit Singson idiay Baluarte, Brgy. Salindeg, Vigan City.
Segun kenni Police Supt. Jugith Del Prado , hepe ti Vigan City Police Station, saan a dimmalan iti usto a protocol ni Valencia ta nagderetso a mismo kenni Singson ngem naduktalan da nga agpampammarang laeng a pastor isu nga inreport da kadagiti otoridad.
Naammuan a namin-uppat a nagsubli-subli ni Valencia idiay Baluarte ngem idi kalman laeng a nairana nga adda ti dati a gobernador ken saan a daytoy ti umuna a gundaway nga inaramid na ti nasao a banag no di ket adun dagiti biniktima na a ti target na ket dagiti prominente a tattao iti probinsiya.
Malaksid iti panagpammarang na a pastor ket nagusar pay ni Valencia kadagiti peke a plaka ti lugan a naala iti kotse nga inabangan na manipud idiay Ilocos Norte.
Ni mismo Singson ti mangipilan ti kaso nga ‘use of fictitious name’ ,estafa ken swindling kontra ti suspek
