Im-imbestigaran ti Philippine National Police dagiti peke a solicitation para kadagiti biktima ti Bagyo Tino nga inaramatda ti Office of the Civil Defense.
Immuna a nangirruar ti OCD ti advisory mainaig iti maysa nga indibidwal a nagpammarang nga empleyado ni Assistant Secretary Bernardo Rafaelito Alejandro IV tapno dumawat ti donasion para kadagiti naapektaran ti Bagyo Tino idiay Cebu.
Pinasingkedan ni Philippine National Police acting chief Lt. Gen. Jose Melencio Nartatez Jr. nga imbilin-na ti PNP Anti-Cybercrime Group ken Criminal Investigation and Detection Group a sapulen ken bigbigen ti suspek.
Innayon pay ni Nartatez a kitkitaen met ti specialized unit ti PNP dagiti digital communications, online accounts, ken financial channels a posible nga adda pakainaiganna iti scam iti pannakibinnulig iti OCD ken dadduma pay nga ahensia.
