VIGAN CITY– Maapektaran ti peace process gapu iti pannakaiparuwar ti arrest warrant ken hold departure order kontra ken ni Sen. Antonio Trillanes iti laksid a nagpiyansa ti senador iti dua gasut a ribo a pisos iti kaso na a rebelyon.
Ti pannakipatpatang ti Bombo Radyo Vigan ken ni Neri Colmenares, mangidaulo ti National Union of People’s Lawyers (NUPL), naibaga na a gapu ti pannakaibabawi ti amnestiya ni Trillanes ket posible a pagduduwaan dagiti miyembro ti komunista a grupo iti maited kadakuada a pribilehiyo nu bilang anamongan da iti natalinaay a patangan pangkappia kadagiti government peace negotiators.
Innayon ni Colmenares a saan laengen a simple nga isyu inaig iti pannakaibabawi ti amnestiya iti sangsangwen ti senador ngem ketdi nalawagen a maysa a political persecution wennu pananglipit kadagiti kritiko iti agdama nga administrasyon.
