VIGAN CITY – Idi pay laeng naminsan ket nakasaganan ti Provincial Disaster Risk Reduction and Management Office nga idaulwan ni PDRRMO officer Michael Chan iti isasangbay ti Bagyo Jenny.
Segun ken ni Chan, naadal dan a nasayaat nu aya ti posible a mapasamak ken addang nga aramiden da iti posible nga epekto ti bagyo ditoy probinsiya.
Kinunana, gapu ta ti probinsiya ket maysa kadagiti nakaibayugan ti Signal Number 2 idi rabii, naka-full alert aminen dagiti rescuers ti PDRRMO, pati dagiti alikamen a kasapulan da, kasta pay dagiti operation centers iti tunggal munisipyo.
Dagiti sumagmamano a heavy equipments a nakasagana nga usaren ti PDRRMO ket pakairamanan ti truck, chainsaw, bangka ken dadduma pay.
Kagiddan iti dayta ket inpanawagan iti opisyal kadagiti tattao nga agnanaed kadagiti lugar a narisgo iti layus ken landslide nga agridam da ken insigida nga agbakwit da nu adda iti pakdaar kadakuada tapnu saan da nga agpeggad.
Innayon na a nu agsukir dagiti tattao ket saan da kayat ti agbakwit, mabalin da nga ipatungpal ti force evacuation kas mandato ni Governor Ryan Singson.
Idi rabii, indeklerar metten ni Singson nga awan iti klase kadagiti amin a lebel dagiti pampubliko ken pribado a pagadalan, kasta pay nga awan ti opisina dagiti empleyado dagiti national government agency ken line agency.
Kabayatanna, dagiti met serrek dagiti empleyado dagiti local government unit ket nakadepende ti mayor idinto a ti serrek dagiti empleyado ti pribado a sektor ket nakadepende iti management da.
