Sinigurado ti Partido Demokratiko Pilipino (PDP) ti kinasaganada a tulongan ni Senador Ronald Dela Rosa iti aniaman a wagas ken gundaway.
Segun ken ni PDP Deputy Spokesperson Ferdinand Topacio, ni Dela Rosa ket maysa kadagiti naisangsangayan a miembro ti partido kas opisyal ken maysa kadagiti tallo a senador a mangibagi iti grupo.
Gapu dayta ket nakasagana ti PDP nga ipaay iti amin a tulong a kabaelan nga ipaay iti maysa a political party iti aniaman nga oras tapno matulongan ti senador iti agdama a sangsangwenna a parikot.
Impaganetget ni Topacio nga agtaltalinaed a solido ti suportar ti PDP para iti dati a Philippine National Police chief iti baet iti agdama a sitwasyonna.
Kondenaren ni Topacio iti mamin-ano a daras a panangibaga ni Ombudsman Jesus Crispin Remulla nga addan ti arrest warrant kontra iti senador.
Kinunana a ti inaramid ni Remulla a panang-leak iti mapapati nga arrest warrant manipod International Criminal Court (ICC) ket saan a nasayaat para iti soberanya ken waya-waya iti pagilian.
