Impasigurado ni Jail Inspector Roger Pascua iti Vigan City Jail nga awan ti nasken a pagdanagan kadagiti Persons Deprived of Liberty nga adda kadagiti pasilidad iti Vigan City Jail kalpasan iti iduduprak ti bagyo Carina ken ti epekto ti habagat idi napalpalabas nga aldaw.
Iti pannaki-uman ti Bombo Radyo Vigan ken ni JInsp. Pascua, saanda a nakaro a naapektaran ta regular ti pannakaisaysayangkat ti facilty inspection babaen kadagiti aggapu iti region.
Kunana nga adda laeng dagiti agtedted kadagiti pasilidad ngem dagus met laeng a narisutda.
Babaen iti tulong ti Provincial Disaster Risk Reduction and Management Council, adda dagiti training nga insayangkatda kadagiti PDL kas iti basic life support tapno tunggal adda dumteng a didigra ket ammoda dagiti aramidenda.
Iti biang met ti Vigan City Jail, nakasaganada latta tunggal didigra ta adda dagiti isaysayangkatda a dry-run para iti Oplan Baha ken Oplan Lindol.
