Agtultuloy nga agar-aramat dagiti agilaklako iti iligal a droga ti naa-atiddug a kabaybayan ken nadumaduma a ruta iti pagilian, ngem agar-aramatda payen iti internet, social media ken online payment systems kadagiti transaksionda, segun iti Philippine Drug Enforcement Agency (PDEA).
Pinasingkedan ni PDEA Spokesperson Atty. Joseph Frederick Calulut a nagbalin a baro a karit kadagiti otoridad ti panagaramat iti digital platforms dagiti drug dealer.
Gapu dayta, mangisaysayangkat kadagiti panagsanay iti cybercrime ti PDEA ken Philippine National Police (PNP), idinto a mapabileg pay ti kabaelanda iti information technology tapno masungbatan dagiti baro nga estratehia dagiti sindikato.
Nupay kasta, impasigurado ni Calulut nga agtultuloy ti operasion dagiti otoridad kontra iti iligal a droga iti baet ti panagbaliw iti wagas dagiti transaksionda.
