Insayangkat nga insigida ti Philippine Charity Sweepstakes Office (PCSO) ti bilin ni President Ferdinand Marcos Jr. a darasen ti panagipatulod ti tulong kadagiti rinibo a residente a naapektaran ti nakaru a layos idiay Maguindanao del Sur.
Segun ken ni PCSO General Manager Mel Robies, pinagtignayda ti authorized agent corporation iti probinsia, 5A Royal Gaming OPC tapno iawaras ti distribusyon iti sangaribo a food packs iti maysa nga evacuation center idiay Datu Piang.
Ti relief efforts ket naisayangkat iti pannakikammayet ti Philippine National Police ken ti local government.
Tunggal food packj ket naglaon ti lima a kilo iti bagas, instant noodles, canned goods, noodles ken potable water.
Impakaammo pay ni Robles a 2,500 a piraso iti charitimba wenno charity timba iti naglaon ti relief goods iti maala manipod Villamor Air Base idiay Pasay City.
Impasigurtado ni Robles a saanda nga agsardeng agingga saan a maited dagiti kasapulan a taraon ken medical assistance dagiti apektado a residente.
Maipalagip a naipasidong ti Datu Piang, Maguindanao del Sur iti state of calamity gapu iti nakaru a layos gapu iti intertropical convergence zone.
