Opisialen a nagtugaw ni PCOL. Agosto Asuncion kas baro a Provincial Director ti Ilocos Sur Police Provincial Office babaen iti naisayangkat a turnover ceremony idiay Camp Elpidio Quirino, Bulag, Bantay, Ilocos Sur.
Ni Asuncion ket tubo iti Ilocos Norte, sinukatanna ni PCOL. Darnell Dulnuan a dati nga ISPPO Provincial Director.
Segun ken ni Asuncion, pagyamananna ti talek a naited kenkuana ken ikarina a maitultuloy dagiti narugian a programa ti dati a police provincial director tapno masigurado ti linak ken talna iti probinsia.
‘Participative’ ti panangiladawanna iti wagas ti lideratona isu a kiddawenna ti suporta ti tunggal maysa para iti kalikagumna a panagdur-as.
Innayon ni Asuncion nga iti duapulo ket pito a tawenna iti serbisio, daytoy ti umuna a gundaway a serbianna dagiti padana nga Ilocano.
Kabayatanna, inladawan met ni Police Regional Director PBGEN. Dindo Reyes ni Asuncion kas maysa a dekalidad nga opisial a dakkel ti maitulongna iti Ilocos Sur.
Kunana a nagun-odna dagiti qualifications iti pannakapilina a baro a provincial director babaen kadagiti dimmalananna a proseso ken training.
