Napaay dagiti kameng ti Philippine Coast Guard ti panangsapul ti bangkay a mapapati a nakita dagiti mangngalap iti kabaybayan a sakupen idiay Barangay Mantanas, Sta. Cruz, Ilocos Sur idi kalman, September 30, 2025.
Iti pannaki-uman ti Bombo Radyo Vigan ken ni Ensign Jayvee Bilgera nga Officer-in-Charge iti Coast Guard Mobile Team – Sta. Cruz, apaman nga impakaammo kadakuada dagiti mangngalap a nakakita iti bangkay ket insigida iti panagtignayda.
Segun ken ni Bilgera, mismo a dagiti mangngalap iti nangkuyog kadakuada a napan iti taaw wenno 28 nautical miles manipod iti kadagaan iti nasao a lugar ngem idi nakadanonda ket saandan a makita iti bangkay a mapapati nga awan iti ulona ken saan a mabigbig iti kinataona.
Idi nadanon iti alas syete y media iti bigat idi kalman (September 30) bayat iti search and retrieval operation dagiti kameng ti PCG ket maysa a mangngalap iti nagpaarayat kadakuada ta nadadaelan wenno naabotan iti bangkana, manipod pay itay ala una iti parbangon isu nga insalakanda.
Numan pay saanda a nasapulan ti bangkay a nakita dagiti mangngalap ket dakkel iti panagyaman ni Bilgera ta iti panagturongda iti taaw ket maysa a mangngalap iti naisalakanda.
Kabayatanna, saan met a sumuko dagiti otoridad iti panagsapul iti bangkay isu nga imbilin ti Provincial Director iti PCG – Ilocos Sur iti panangisayangkat iti intensive seaborne patrolling dagiti amin a coastal municipality iti probinsia tapno makita ti nasao a bangkay.
