Naka-standby ti intero a Philippine Coast Guard Region 1 iti posible a pannakaipatulod dagiti kamengda iti ili ti Sta. Catalina no kas bilang mapasamak ti tsunami gapu iti nagsasaruno a gingined iti kabaybayan.
Iti pannaki-uman ti Bombo Radyo Vigan ken ni Arnel Arellano, person-in-charge ti PCG Substation-Sta. Catalina, sipud pay idi December 17 a panangrugi ti gingined iti kabaybayan ket nangisayangkatdan iti information dissemination kadagiti agindeg – pinakaamoanna ida no ania dagiti nasken nga aramidenda no sumangbay ti tsunami.
Binalakadan ni Arellano dagiti agindeg nangruna kadagiti asideg iti kabaybayan nga agridam, paliiwen dagiti pagilasinan iti tsunami kas iti panagsanud ti danum, napigsa a gingined ken nariri nga uni ti kabaybayan tapno makabakwitda a dagus ta adda met dagiti nakasagana nga evacuation site.
Iti agdama, agtultuloy ti monitoringda iti igid ti kabaybayan tapno masaganaan ti ania man a madi a mapasamak.
