Pormalen a pinirmaan ni Presidente Ferdinand Marcos Jr ti Executive Order No 94 a mangbukel iti Independent Commission for Infrastructire, maysa nga ad hoc fact-finding body a tumutok kadagiti alegasyon iti iregularidad, misuse of funds, ken posible a korapsion kadagiti proyekto ti gobierno, nangruna iti flood control ken dadduma pay nga imprastraktura.
Maibasar iti pammilin, idaulwan daytoy ti maysa a Chairperson ken dua a miembro ti komision, a nasken nga adda kabaelan, integridad, ken independent.
Adda turayna daytoy nga agimbestigar, agala iti ebidensia, mangisingasing iti preventive suspension ken mangipasa kadagiti report ken rekomendasyon mainaig iti maseknan nga ahensia para iti napaspas a panangipila iti kaso.
Karaman pay iti mandato ti ICI ti panangrepaso kadagiti proyekto nga adda anomaliana, panangi-freeze iti asset mainaig iti korapsion, ken pannakitinnulong kadagiti eksperto ken resource person tapno masigurado a transparent ken accountable ti proseso.
Inyunay-unay ti presidente a natibker ti administrasyonna a manglaban iti korapsion, ken mangsigurado a natalged ken naurnos ti pannakaipatungpal dagiti proyekto a napateg para iti kasasaad ken seguridad dagiti Pilipino.
