Nagbalinen a linteg ti gakat a mangipalubos iti gobierno nga agideklarar iti ‘state of imminent disaster’ sakbay pay a dumuprak ti bagyo tapno makasagana ken makaaramid kadagiti addang a mangsalwad kadagiti komunidad.
Iti salinong ti Republic Act No 12287 a pinirmaan ni Presidente Ferdinand Marcos Jr., mangbukel ti gobierno iti mekanismo para iti panangideklarar ken panangibagyog iti State of Imminent Disaster kasta payen ti pannakapondona.
Maikkan turay ti chief executive a mangideklarar iti state of imminent disaster iti grupo dagiti barangay, ili, siudad, probinsia ken rehion maibasar iti singasing ti National Disaster Risk Reduction and Management Council (NDRRMC).
Dagiti local chief executive ket mabalin nga agideklarar iti state of imminent disaster babaen iti Executive Order iti masakupanda, maibasar iti singasing dagiti Regional Disaster Risk Reduction Management Council mainaig kadagiti lugar nga adda peggad iti didigra.
Ti NDRRMC ken Regional DRRM ket mangipatungpal iti pre-disaster risk assessment iti panagduprak ti didigra a mabalin a mangitunda iti peggad, ken daytoy ti agbalin a pagibasaran iti deklarasion.
