Binilin ni Presidente Ferdinand Marcos Jr. dagiti amin a kangrunaan nga ahensia ti gobierno tapno dagus nga agtignay kasaruno ti magnitude 7.8 a gingined idiay Sarangani ken kabangibangna a probinsia.
Iti statement nga inruar ti presidente, kunana a makibimbinnulig ti Office of Civil Defense ken National Disaster Risk Reduction and Management Council kadagiti amin nga apektado a lugar ken nairugin ti disaster response ken monitoring.
Binilin pay ti presidente ti Department of Social Welfare and Development a mangisaganada iti relief goods tapno masigurado a nakasagana ken operational dagiti evacuation center.
Uray pay ti pannakasuspenso ti klase iti amin a lebel kadagiti apektado a lugar idiay Mindanao ket imbilin ti presidente.
Kiddawna kadagiti agindeg a naapektaran iti napigsa a gingined a sumurot iti pakdaar iti tsunami warning ken agbakwit nga insigida kadagiti nangato a lugar para iti kinatalgedda.
