Nangbukel iti legal team ni Presidente Ferdinand Marcos Jr a mangtutok kadagiti kaso a naipila kontra kadagiti nairaman iti naanomalya a flood control project.
Segun ken ni Marcos, agtultuloy ti panangkitada iti listaan ti Department of Public Works and Highways ken dagiti dakkel a contractor, nga isu ti agserbi a pagibasaran no agpadanto kadagiti maala a report manipud iti Sumbong sa Pangulo website.
Innayonna a nakadepende pay daytoy no umabot iti punto nga agbalin a nationwide ti panagipila iti kaso nga isu ti tutukan ti legal team-da.
Impaganetget ti presidente nga adu ti kapada ti proyekto kas iti naduktalan a ghost flood control project iti Bulacan isu a saanda a sardengan dagiti adda iti likudan ti nakaro nga anomalya a ti karaman ket dagiti contractor, taga-DPWH, ken dadduma pay a proponent.
