Nagpanawagan ni Presidente Ferdinand Marcos Jr kadagiti Pilipino a botante a pumili kadagiti lider nga adda integridad ken kabaelanna a mangisakit kadagiti umili.
Inallukoy pay ti presidente dagiti amin a rehistrado a botante nga aramaten ti karbenganda nga agbotos.
Iti salinong ti Proclamation No 878, indeklarar ni Marcos ti May 12, 2025 wenno inton bigat, Lunes kas special non-working holiday tapno makipaset ti amin a rehistrado a botante nga agbotos para iti national and local elections.
Kabayatanna, impasigurado met ni Presidential Communications Office Secretary Jay Ruiz iti publiko a nainget ti pannakikinnammayet dagiti nadumaduma nga ahensia ti gobierno kadagiti stakeholder tapno masigurado ti napudno, naurnos ken nakappia a panagpipili.
