Nadismaya ni Presidente Ferdinand Marcos Jr iti resulta ti K-12 program gapu ta adu latta dagiti agad-adal a saan a makatrabaho uray nagturposdan iti Senior High School.
Patien ni Marcos nga awan ti naited a pagsyaatan ti K-12, ta saanna a natungpal ti kari ti programa idi a nadaraston a makastrek iti trabaho dagiti SHS graduate.
Marikna ti presidente ti rigat dagiti nagannak iti K-12 program ta nayon ti gastusenda ti dua a tawen a matrikula ken dagiti dadduma pay a pagkasapulan dagiti agad-adal.
Nupay kasta, ipaimana iti kongreso ti desisyon no maituloy ti programa, ta ti laeng maaramidda iti ehekutibo ket pasayaaten ti curriculum bayat ti pannakaipatungpalna.
Binagaanna ti Department of Education ken dadduma pay a maseknan nga ahensia a sayaatenda ti K-12 curriculum tapno maisagana dagiti estudiante iti panagtrabaho ken maliklikan ti job mismatch.
