Manamnama a makisinnarak ni Presidente Ferdinand Marcos Jr kadagiti Pilipino nga agtrab-trabaho ken aggigyan idiay South Korea iti naituding nga idadar-ayna iti APEC Economic Leaders’ Meeting inton October 30 agingga November 2, 2025.
Segun ken ni Department of Foreign Affairs Spokesperson Angelica Escalona, paset iti schedule ti presidente ti pannakisinnarak kadagiti Pilipino idiay Busan tapno kamustaen ida ken ipakaammo dagiti ar-aramiden ti gobierno para kadagiti Pilipino.
Iti agdama, nasurok 70,000 a Pilipino iti Korea ket 42,000 kadagitoy ti Overseas Filipino Workers nga agtrabtrabaho iti manufacturing, agrikultura, ken panagkalapan.
Adda pay dagiti Filipino professional nga agtrab-trabaho idiay South Korea, dadduma ket iti sektor ti entertainment ken household workers.
